يا مرحبا بمن زارنا ملايين .. شرفتوا

" في ضيافة الجيون " .. ألا وهو موضوع احاول ان اقدم فيه نصايح وافكار .. بالاضافه إلى بعض الصور من تصويري لتوضيح الفكره

والهدف من الموضوع هذا .. الإستفاده بإذن الله

* الزيارة الأولى :

كل ما ايوونا خطار (1) ولا حد من الأهل لازم انحط الهم الفواله .. والفواله ايكون فيها من كل انواع الأكل شرات الدلال ( دلال القهوه والجاهي والحينه قاموا يسوون الجاهي حليب والنسكافيه ) وطبق الخبيص والبلاليط وغيره وايد وملة الفواكه بعد .. ودومها زاهبه عشان لو اييونا هالخطار في اي وقت ما نتلوم فيهم

لكني أنا اليوم بتكلم عن الفواكه .. من وجهة نظريه أنا دام انه الفواكه مغسوله ومحطوطه في مله ومصفوفه الا جيه محد بييها .. فأنا أشوف لو انّا انقطع الفواكه وانصفها في صحن كبير بيتشجع الضيف ياكل منها .. وبتكون اسهل لك انته يا راعي البيت وللضيف حتى

وحتى لو ما يوكم ضيوف حتى اليهال بيغريهم شكل صينية الفواكه وبياكلون .. مثل ما كلنا انعرف الفواكه وايد ضروريه وصحيه ولا اتضر لو شو ما كلت منها

هذي الصوره .. اتوضح الكم الطريقه .. اللي انا سويتها وكيف صفيت الفواكه في الصحن .. الصحن تقريبا عرضه 30 سم حطيت فيه الهمبا والعنب ( أخضر واسود ) وسنطره و فراوله ورمان نوعين ( الأحمر و الأبيض ) والموز والكيوي

أما هاي الصوره .. فأنا حطيت فيها حليب نستل مكثف .. مخلوط باشوية حليب عشان ما يكون غليض .. والثاني فيه حلاوة جاليكسي مذوب في حمام ماءي مع اشوية حليب

لكن الحلاوه يتذوب قبل التقديم بدقايق هب بنص ساعه ولا بفتره طويله عشان ما ايمد

ان شا الله اتكون عيبتكم الفكره .. وان شا الله تستفيدون منها

(1) الخطار : هم الضيوف باللهجه المحليه